الاثنين، ديسمبر ٢٩، ٢٠٠٨

عمرو أديب يرد على دعوة حسن نصر الله المصريين للاستشهاد : احنا عملاء ومفيش مننا فايدة ...حارب انت !!!

استهل عمرو اديب حلقة امس من برنامج القاهرة اليوم بهجوم غاضب على خطاب حسن نصر الله الامين العام لحزب الله اللبنانى والذى طالب فيه المصريين بالخروج بالملايين ومواجهة بنادق الشرطة التى لن يمكنها قتل كل هذه الاعداد الضخمة ، وافتى ان من يقتل فى هذه المعركة سيكون شهيدا
قال عمرو أديب: النهاردة سماحة السيد حسن نصر الله فى خطابه كان بيطالب المصريين انهم ينزلوا الشوارع وافتى ان اللى هيموت فى المظاهرات شهيد ، فى نفس اللحظة اول واحد يتقتل رائد مصرى على الحدود لما ربنا يسالنا يقول لنا عملنا ايه هنقول قتلنا ضابط واحد فى مصر احنا مش ضاحية دى مصر اللى فيها 80 مليون بنى ادم
سماحة السيد انا مش عايز ابنى يستشهد فى مظاهرة وليه ثقافة الموت وليه احنا اللى نموت هل ده دورنا احنا ؟
احنا اللى لازم نموت ؟
المعونات الى دخلت النهاردة مش من فلوس حسنى مبارك لا من فلوس المواطن المصرى اللى بيكسر من لقمته ويأكل اللى جنبه ، تعالى شوف الفقر فى بلدنا عندنا الف قرية تحت خط الفقر مصر النهاردة هى عميلة ياسماحة السيد ؟
لما تقرب من بلدى ومن الريس بتاعى هاقوللك لا وارفض ده أنا عميل لمصر !!
ايوه انا عميل لمصر
لعبد الحليم وام كلثوم والغلابة والسلام بالنسبة لنا مش مغامرة انت كنت فين وقت ماكنا بنحارب اسرائيل
الراجل اللى انت بتتكلم عنه النهارده كان راكب طيارة بيضرب الاسرائيليين وعرض حياته للموت
وانت كنت عيل
احنا عملاء يا اخى والشعب ده مفيش منه فايده ارجوك وبسرعة الحق اخوانك الفلسطينيين بجيشك الجرار
انجد اخوانك الفلسطينيين
احنا عملاء وتعبانين ويادوب اللى قدرنا عليه نكلم الناس تبطل حرب
حارب انت اول رصاصة انطلقت دخلت جسم ضابط مصرى مسلم
جايز اننا نقتل بعض لكن بدل مانولع فى البلد خللى الفلوس دى نبعت بيها ادوية للناس
يا ايران ...فين صواريخك النووية ياختى ؟!!!
وأضاف: الاسرائيليين فى فرح وسعادة مفيش زيها ، شوف العرب بيضربوا بعض ازاى
انتى فين يا ايران وفين صواريخك النووية ياختى ماتنجى اخوانك
احنا حيالله حاربنا 50 سنة وقلنا كفاية حارب انت الاسرائيليين هيكملوا ويجيبوا عاليها واطيها
20 طفل ماتوا وايه اخرتها ، كنت متوقع منك تطلع تمد ايدك لمصر وقطر والاردن وسوريا وتقول هنعمل ايه ؟
لكن اللى عملته انك دعيت الناس تنزل تموت فى الشوارع وتضرب بعضها
ابنى ياسماحة السيد ماتهدش محتاجين اللى يجمع مش يفرق
يا ايران تل ابيب اهه على الخريطة صاروخ ولا صاروخين ، اللى ما شفت مواطن ايرانى اتعور بسبب اسرائيل ......
هو كمان بينتقى الوقت والميعاد اللى يختار فيه امتى يحارب ، ومفيش حد قاوم ببسالة اكثر من حزب الله
طب والبلد دى ال80 مليون مش برضه الريس بتاعها من حقه يختار الوقت اللى يناسبه
نصر الله لم يذكر النهاردة امريكا من قريب او بعيد ، احنا ربنا خلقنا فى الارض علشان نعيش مش عشان نموت ، لو الناس قعدت فى بيتها هتعمل ايه
الف نفق كانوا بينقلوا منها عصير قصب مصرى ولا سلاح وغذاء؟!
أكمل عمرو : النهاردة الخبر الوحيد اللى موجود فى قناة الجزيرة ان عربيات المساعدات بتاعة قطر مادخلتش ، والحاجة هتدخل لان عدم دخولها مسالة وقت
النهارده اسرائيل ضربت الانفاق ، الف نفق اتضرب
هل هناك من يتخيل ان الادارة المصرية مش عارفة ان فيه الف نفق ، ده كانوا بينقلوا فيه ايه ؟
عصير قصب مصرى ولا قطن ؟
طبعا مصر كانت تعلم وبيعدى منها اكل وسلاح ودوا وكل حاجة وانت عندك الجنوب خف على اخوانك شوية بصاروخين تلاتة وارجع
واقول انا مااساويش حاجة فى عمامة حسن نصر الله
لكن لما تقرب لبلدى ارفض واقوللك انا عايز ابنى يطلع دكتور ولا مهندس مش عايزه يتقتل
ده الضابط المصرى بيبنى كوبرى ويعمل طريق ، الضباط المصريين محترمين وشرفاء
كنا فاكرينك هتطلع توحدنا ..... تفكر معانا لما يحصل اجتياح هنعمل ايه ؟ اللى مش متهمين بعمل اتفاقات مع اسرائيل عملوا ايه ؟ ناضلوا ازاى ؟
تعالى شوف ابطالنا اللى عبروا واللى قعدوا فى كبريت واللى استشهدوا ..........ارجوك مصر بتحبك واحنا معندناش شيعى وسنى .... يوم ما كنت بتحارب كنا واقفين وراك ، مد ايدك لينا واطلع قول احنا أمة واحدة نقف مع بعض الطريق الى القدس لا يمر بمصر
أنا عمرو اديب عميل جهاز امن مصر القومى ، باعيش منه وعلشانه وباعترف تعالوا نؤجر عربيات نقل كبيرة وبدل مانطلع نكسر نلم اللى فايض فى بيوتنا من دوا وبطاطين واكل ونروح نوديها
شباب مصر يتظاهروا ويشتموا الحكومة زى ماهم عايزين لكن لما ييجى الامر يقرب لامن بلدى هقف ورا الستات والاطفال والناس والتاريخ الموقف ده اتكرر كام مرة وقطعنا بعض ؟
سماحة السيد حسن نصر الله الطريق الى القدس لا يمر بمصر طرق تحرير القدس تعرفها جيدا
وحالنا كعرب يكسف ولا عملنا اى انجاز واتضحك علينا وفلوسنا خدوها الاجانب وماتقدمناش
الحسين بن على سيد الشهداء مات علشان ماتحصلشى فرقة وكان ممكن حلول كتير
كان عايز المسلمين يتجمعوا لكن للاسف من بعده اتشققنا لمليون شيعة
اتفرجوا على اليهود من نيويورك الى اورشليم ولو دخلةا غزة وراهم الراى الاعم الاسرائيلى والاحزاب اوروبا مستنية المذابح تحصل ويبعتوا شوية لعب لاطفال غزة وامريكا أوسخ واوسخ يتبقى مين ؟
احنا بس تعالوا نتجمع هل شفتوا قبل كده
رئيس هولندا بيشتم رئيس السويد
ولا رئيس وزراء بريطانيا يقول لساركوزى ياعميل يابتاع المانيا
فكوا غضب الناس بحاجة ايجابية مش سلبية بلدنا محتاجة اللى يقف جنبها
مش يولع فيها وأقسم : ورحمة ابويا ده اللى انا مقتنع بيه وبلدنا محتاجة اللى يقف جنبها مش يولع فيها ، القيادة السياسية تتحمل مسئولية ماتفعله
هل الغيرة اللى فينا كمصريين مش دليل اننا مابعناش القضية ونفسنا لسة نروح نصلى فى المسجد الاقصى
فيه دول ماسمعناش اسمها ومالهاش دعوة بالموضوع خالص وهم معانا فى جامعة الدول العربية برضة ومحدش بيقوللهم انتوا فين ، شوفوهم مادام يئستوا من مصر انت شايف ان مبارك مش هيعمل حاجة اطلبوا من اللى جنبنا حسنى مبارك عنده فقط اولويات ...
ومع ذلك بيعمل على قد مايقدر لما تم اجتياح جدار رفح بيوت المصريين اتفتحت واتعمل لهم شاى من السكر المدعوم وفيه فلسطينيين لسة قاعدين عند مصريين فى سينا لغاية دلوقتى
ليس عندنا ثقافة نقد الرئيس الدكتور حمدى حسن عضو مجلس الشعب ( اخوان مسلمين ) علق على خطاب نصر الله قائلا: ده خطاب جماهيرى ثورى يطالب الشعوب بانها تمارس دورها ، واحنا ماعندناش ثقافة نقد الرئيس فى بلادنا ، قدر مصر انها تشيل هم القضية الفلسطينية وهى الام لكل العرب لذلك فى اى مصيبة يلجأ لها الجميع لانها تستطيع القيام بواجبها
ومصر جارة للارض المحتلة ولا احد ينكر ما قدمته للقضية الفلسطينية ، لكن ماذا قدمت مصر الآن ؟
المعبر مفتوح لدخول اشلاء مش جرحى انا حز فى نفسى الحصار المفروض على غزة ، لما رحت اودى مساعدات غذائية منعونى فى اول مرة عند الاسماعيلية وفى المرة الثانية منعنا واحنا فى قلب القاهرة ، فهل هذا يليق بمصر ؟!!!احنا كنواب وقضاة ضربنا على سلم مجلس الدولة ، ولم يسمح لنا بالتجول داخل بلدنا ونودى الواجب فيه 250 مصرى فى السجون الان منهم صبى عنده 16 سنة لانه ككان بيجمع 2 و75 قرش للفلسطينيين وكلهم متهمين بجمع مساعدات لفلسطين
وعن دعوة نصر الله لنزول الجماهير فى الشارع والاستشهاد ...قال : انا لا اؤيد العنف واننا نقتل بعض والافضل اننا ننزل نلم التبرعات لاهل غزة
النائب مصطفى الجندى ( مستقل ) قال : طالبنا فى المجلس بقطع الغاز واخذ موقف قوى والنهاردة بعد ماتابعت وزير الصحة واقف ومش لاقى مصابين قلت لحماس اننا عايزينكم ترجعوا تجاهدوا وتسيبوا السياسة انا اعتصمت مع النواب اللبنانيين لحد ماتفك الحصار ورحت قلت له انت رفعت راسنا النهاردة لما بدأ حديثه قلت فين ايران وسوريا ، انتظرت ان يذهب كعادته الى الموضوع مباشرة ويقول انه هيحارب لكن للاسف دعا المصريين ... اتلم يا نصر الله وين رجولتك انت واعضاء حماس للظهور والمقاومة بدلا من الاختباء فى جحور الارانب وتعريض البشر الى القتل والاستشهاد من اجل شعارات ...... هيهات من الذلة.....لبيك يا نصر الله......شعارات هذا ما يفعله العرب دائما

هناك تعليقان (٢):

غير معرف يقول...

صحيح لو هو عايز ياحارب يجى العريش

يدخل غزة ويحارب

غير معرف يقول...

الاستاذ عمرو اديب المحترم
ردا على ردك في الرسالة الموجهة الى السيد نصرالله احنا منعرف كويس باللهجة المصرية ان الشعب المصري مجاهد ومقاوم ولكن عندما تتعلق الموضوع بالارتهان السياسي لقوى امبريالية خاضعة للوبي الصهيوني واستعباد الشعوب واسر المناضلين وتجويع شعب مصر العظيم شعب عبد الناصر شعب الازهر المقاوم شعب رشيد وبور سعيد شعب الفدائيين اسمح لي يا استاذ عمرو ان لا تأخذ باطراف الحكام لتحافظ على موقعك بالقرب من الزعماءلذلك راجع مقالك وكلمات السيد جيدا وكن بكالماتك مقاوم ولست بخانع انت بقلمك تستطيع ان تكون حرا وليس بعبد كرسي اومقام ....وعجب من هذا الزمان الذي اصبح فيه الانسان عبدا للامراء والحكام.....